تزيــين ( 1 ) الكيـك

طريقة تزيـين الكيك بالكريمة

يعني اشلون انسوي هالحركات اللي اتكون فوق الكيكة

.. مثل أشكال الورد وغيرها

نحتاج لتزيـين الكيك معرفة شغلتين أساسيتين



الأولى : اهي معرفة أشكال الرؤوس والأقماع اللي نستخدمها للتزيـين

والثانية : وهي معرفة طريقة عمل لكريمة الخاصة المستخدمة للتزييـن



أول شي

بنشوف أشكال هالرؤوس والأقماع اللي نستخدمهم للتزيـين

وعلى فكرة كل شكل منهم له رقم معين ثابت ما يتغير

لو وين مارحنا لأي محل ونبي نشتريهم

بنلاقي ارقامهم ما تغير .. اهي نفسها ابكل مكان

وان حبيتوا تشترونها بتلاقونها بالمحلات لكبيرة المتخصصة ابهالأمور

بالقسم الخاص لأدوات شغل الكيك وتزيـينه



انزين .. لنفترض انك بتزينـين الكيكة عالسريع وما تبين ذيك الحركات والسوالف الوايدة عليها

.. فاهني ممكن نستخدم كيس الشمع العادي المعروف ب

"Parchment Bag"
وهذي اهي طريقة سوايته

قصي مثلث من ورق الشمع بضلع طوله 15سم من كل جانب

لاحظي اشلون وضحت الزوايا وبنسمي كل زاوية ابحرف

A , B, C

علشان توضح عندك الزوايا وتعرفين بعدها شتسوين بالضبط مع كل زاوية

الحين .. مسكي مثلث الورقة وخلي زاوية

B

بتجاهك

الحين مسكي طرفين الزاويتين

A,B

بعدين لفي عليهم من فوق طرف الزاوية الثالثة

C

باتجاه اليمين وبكذا تتقابل كل الزوايا

الحين عندك قمع شمعي كامل

والحين مسكي الكيس بيديك وبحركة خفيفة بالإبهام قومي بسحب الزاويتين

A,C

بإتجاهات متعاكسة

الغرض من هالشي اهو أنجك تتحطمين بمقاس رأس القمع أو الكيس من فوق

اما تخلينه صغير او كبير حسب النقشه اللي تختارين رسمها عالكيكة

تزيــين ( 2 ) الكيـك

مقادير وطريقة لكريمة الخاصة لتزييـن الكيك

لأن هالكريمة سهلة باستعمالها لتزيـين أي نوع من الكيك

لي بغينا نستخدمها لتغطية الكيكة
لازم اتكون متماسكة ورخوه بعض الشي .. يعني باردة اشوي
لأن لكريمة ان ما كانت متماسكه لي الوقت اللي نبي نستخدمها فيه
ماراح تعطينا الشكل اللي نبيه للتزيـين لانها بتكون ذايـبه

والحين بذكر مقادير هالكريمة



نص كوب زبدة " طرية اشوي "

" ملعقه وحده من الفانيلا السائلة "
ولازم اتكون موملونة لأن اللون يغير لون الكريمة

اربعة اكواب سكر أبيض بودرة

ملعقتين حليب سائل


نخفق الزبدة عدل بالخفاقة الكهربائية
نضيف الفانيلا
وبالتدريج نضيف السكر مع الاستمرار بالخفق على سرعة متوسطة

وبعد مانحط كل السكر بتصير لكريمة صلبة وجافة

وبعدها نضيف الحليب معلقة ملعقه كل مرة ونستمر بالخفق
لين تصير لكريمة خفيفة وطرية اشوي
ولي خلصنا نحفظ هالكريمة بعد ما نغطينها عدل بالثلاجة لي وقت الإستعمال

.. عند إستعمالها نخفقها عدل مره ثانيه قبل ما نبتدي بالتزيـين فيها
ممكن تكون متماسكة اشوي
لكنه بالنهاية أضبط لعمل أشكال التزييـن عالكيكة

لي حبينا نستعملها لتغطية الكيك ابشكل كامل مثلا
نضيف ثلاث أو أربع ملاعق صغيرة
من ال
corn syrup

أو حتى اشوية نقط من الماء ونخفقهم مع لكريمة علشان اتصير رخوة اشوي


على فكره
لي بغينا نمسك الكيس الشمعي اللي بنحط لكريمة داخله
لازم نمسكه ابشكل مستقيم
يعني لي بغينا انسوي مثلا نجوم عالكيكة لازم نمسك الكيس بشكل مستقيم
مثل الصورة

لازم إتكون الزاوية 90 درجة
لكن لو ميلتي إيدج هالنجوم ما راح تطلع عدله

وبوضح ان علشان ما تلصق لكريمة بيدج لي ضغطتي عالكريمة غطي أصابعج بشوية نشاء


اوكي والحين انشوف اشكال لطرق التزييـن عالكيك

كريمة الأرنب

عن طريق استخدامنا لرأس رقم
A2
واللي وضحتهم بالصور ابايميل الجزء الأول
أول شي نقوم فيه اهو عمل دائرة للرأس
و
ونضغط اشوي علي وسط الدائرة علشان انواسي السطح
و
برؤوس رقم 12
نلصق الأذنـين برأس الأرنب مع مدهم في نهاية الطرف لكل أذن
وبعد جذي نستخدم الرأس 3
ونسوي نقط للعيون و الأنف والخدود
وطبعآ ما ننسى تميـيز كل جزء انسويه ابلون مختلف عن غيره
علشان توضح معانا الصورة أكثر وهم يعطيها شكل احلى





شرايط الورد

عن طريق استخدام رأس رقم 104
انسوي ربطة عند اليمين بعدها عند اليسار واخرها شرايط في الوسط

شكل الجزر

برأس رقم 3
نقوم بعمل كيس التزييـن ونضخ لكريمة بقوة
مع عمل تعرجات خفيفة علشان تاخذ لكريمة شكل الجزر
وعند الطرف أرخي الضغط علي كيس لكريمة
وخلي طرفها مدبب مثل الصورة
و بستخدام رأس رقم 233
وبكريمة بلون أخضر أسوي أوراق الجزر

شكل الدب

رأس رقم 12
نسوي دائرة كبيرة لجسم الدب
وبصبعج وهو عليه اشوي من النشاء علشان ما تلزق لكريمه ابايدج
ضغطي اشوي اشوي على وسط الدائرة
لين يستوي السطح
وبرأس رقم 3 أنسوي الرأس والأطراف
بنفس الطريقة السابقة
مع ملاحظة أن يكون رأس الدب أكبر من الأطراف
واخر شي برأس رقم 1 أنسوي لعيون والاذنيـن

تزيــين ( 3 ) الكيـك

الذرة

باستخدامنا لرأس رقم 3
نقدر انسوي مستطيل كبير
وبعدها ابرأس رقم 2 أو 1 انغطيه ابحبات من لكريمة
وبعدين انسوي اوراق الذرة الخضراء برأس رقم 349

شكل الخروف

رأس رقم 8
نسوي الجسم واحنا قاعدين نضغط ابايدنا ابضغط متوسط عالكريما
لين مانخلص ونوصل لرأس الخروف انسوي دائرة كبيرة للرأس
والحين ابرأس رقم 1 وبلون بني نسوي وجه الخروف
وبنفس الرأس رقم 1 أنكمل باقي تفاصيل الوجه
اما عاد الأذنين انسويهم ابرأس رقم 81
واخر شي نستخدم رأس رقم 14 لتغطية الجسم بالصوف

وردة بسيطة

نبدي نسوي أول ورقة بإستخدامنا لرأس التزييـن رقم 7

انسوي ورقة ورقة ونخليهم لاصقين ابعض

لين ماانحصل على وردة كاملة

واذا انحب بعد جذي انحط نقطة بالنص بكريمة صفرا

علشان تعطي لورقة شكل حلو وقريب من شكل الورد الطبيعي

الليلي الأبيض

علشان انسويه لازم اتكونين فعلا حابه الشكل لهالورده وخاطرج اتسوينها لأن شغلتها اشوي اكثر من غيرها

واحنا فيها نحتاج نستخدم الى قالب خاص

اسمه بالإنجليزي

" Lily Nail "

راح أشرحه استخدامه لي نزلنا اشوي تحت


علشان انسوي وردة الليلي أول شي نغطي القالب بورق القصدير

مثل ماهو موضح بالصورة

ونسوي ورقة وردة الليلي بإستخدامنا لرأس رقم 68

مع مراعاة أن يكون يبدي راس لورقة في قاع القالب

ويكون طرفها الأخير اللي تنـتهي فيه لورقه على حافة القالب

علشان تاخذ أوراق الوردة شكل قريب للورد الطبيعي
انكرر هالخطوة كذا مره لين مايصير عندنا وردة الليلي كاملة

واخر شي في ننـثر اللون الأصفر في وسطها ونوزعه في داخلها

ونقدر اهني نستعين ابفرشة ألوان صغيرة





قالب الليلي ... " Lily Nail "

اهو عبارة عن قالب بلاستيكي يتكون من جزئين

جزء علوي وجزء سفلي

طبعآ القالب متوفر بأحجام مختلفة لعمل ورود بأحجام مختلفة

انزين ... القالب السفلي نستخدمه دايما لعمل الورود

أما الجزء الثاني العلوي

فهذا نستخدمه لضغط ورق القصدير في داخل القالب السفلي

لاحظوا الصورة هذي

بالنسبة للورود اللي نسويها بالقالب : نفتح القصدير اشوي اشوي مع الحرص على شكلها

وبعد ما تنشف انشيل القصدير ونزين الكيك ابهالورد اللي سويناه



على فكرة مافي اشكال سهلة واشكال صعبه

كلها بس تحتاج للممارسة

مرة بعد مرة ابتـتقنينهم

بس انتي حاولي فيهم أول مره على جنب

مو عالكيك على طول علشان اتدربين على الشكل

بعدين عاد طبقي على كيكتج

وعموما ان كنتي بتخلصين ابسرعه وموهامج وايد كل هالأشكال

في اشكال ممكن تستخدمينها للسرعه

مثل النجوم اللي بالصور

وعلشان اتسوينها تحتاجين لرأس رقم 16

خليهم لاصقين ابعض وبتحصلين على هالشكل اللي بالصور

من الايميل للفائدة